ღვინო - ალკოჰოლური სასმელები >> "ღვინოებში იგრძნობა, რომ ისინი გულიდან მოდიან" - ამერიკელი სპეციალისტები ღვინის ქართულ ბაზარს ეცნობიან
"ღვინოებში იგრძნობა, რომ ისინი გულიდან მოდიან" - ამერიკელი სპეციალისტები ღვინის ქართულ ბაზარს ეცნობიან

ამერიკელი ღვინის პროფესიონალები ქართულ ღვინის ბაზარს ეცნობიან. როგორც ALLWINE.GE-ს სოფლის მეურნეობის სამინისტროდან აცნობეს, საქართველოს ერთკვირიანი ვიზიტით ეწია ამერიკელი ღვინის პროფესიონალების ჯგუფი, რომლის შემადგენლობაშიც ღვინის იმპორტიორები, სომელიეები და ღვინის შესახებ მწერლები არიან. ჯგუფის ხელმძღვანელია ღვინის ეროვნული სააგენტოს კონტრაქტორი, ამერიკული მარკეტინგული კომპანია Marq Energie-ის მმართველი ჯული პეტერსონი (Julie Peterson).

სამინისტროს ინფორმაციით, ტურის ფარგლებში სტუმრებმა დაათვალიერეს ქართული ღვინის მწარმოებელი კომპანიები ქართლში, იმერეთში, გურიაში, რაჭა-ლეჩხუმში და კახეთში, სადაც გაეცნენ ქართული ღვინის დაყენების ტექნოლოგიებს, დააგემოვნეს როგორც ევროპული, ასევე ტრადიციული მეთოდებით დამზადებული ღვინოები.

როგორც Marq Energie-ის ხელმძღვანელი აცხადებს, ქართული ღვინის მიმართ ინტერესი ამერიკის შეერთებული შტატების ბაზარზე მზარდია.
„ბევრი ღვინის მწერლისა და სომელიესთვის ეს პირველი ვიზიტი იყო საქართველოში. ჩვენ ვესტუმრეთ დასავლეთ საქართველოს - რაჭას, იმერეთს, ლეჩხუმს, რადგან გვაინტერესებდა, რა ხდებოდა იქ ღვინის სფეროში, ვინ არიან მწარმოებლები, რომელი განსხვავებული ყურძნის ჯიშებია, რითი განსხვავდება აღმოსავლეთისგან აქაური ღვინოები. ბოლო სამი დღის მანძილზე დასავლეთ საქართველოში ვიყავით, დღეს ქართლში ვართ და შემდეგი სამი დღე კი კახეთში ვიქნებით. ვიმოგზაურებთ აღმოსავლეთ საქართველოში, რათა შევადაროთ აღმოსავლეთის სტილი და ჯიშების მრავალფეროვნება დასავლეთ საქართველოს ღვინოებთან", - განაცხადა ჯული პეტერსონმა.

ჯგუფის შემადგენლობაშია ცნობილი ჟურნალისტი, ჟურნალ Wine and Spirit-ის მთავარი კორესპონდენტი, (რომელიც ასევე წერს Los Angeles Times-ში) პატრიკ კომიკსი.

„ეს ჩემი პირველი მოგზაურობაა საქართველოში. რამდენიმე წელია, რაც ქართულ ღვინოებს გავეცანი, თუმცა აქ ყოფნა სრულიად განსხვავებული გამოცდილებაა, ბევრად რეალურია და ეს ადგილიც ძალიან ცოცხალია. საუკეთესო, რაც შეიძლება ითქვას ხალხზე, ღვინოზე და კულტურაზე ისაა, რომ იგრძნობა, რამდენად ნამდვილია ყველაფერი, განსაკუთრებით ღვინოები. რაც უმნეშვნელოვანესია ჩემს მკითხველს გადავცე, რომ ეს ერთ-ერთი უმშვენიერესი ღვინის ქვეყანაა, რაც კი ოდესმე მინახავს, მოკრძალებული და ნამდვილი. ღვინოებში იგრძნობა, რომ ისინი უბრალოდ რომელიმე განსაკუთრებული ადგილიდან კი არა, გულიდან მოდიან", - აღნიშნა პატრიკ კომიკსმა (Patrick Comisky).

სამინისტროს ინფორმაციით, ქართლში ამერიკელი პროფესიონალები სოფელ ჩარდახში მეღვინე იაგო ბიტარიშვილს ესტუმრნენ, რომლის განცხადებით, მსგავსი ღონისძიებები ქართული ღვინის ცნობადობის გაზრდას და, შესაბამისად, აშშ-ის ბაზარზე ექსპორტის ზრდას უწყობს ხელს.

„ბაზრების დივერსიფიკაცია ქართული ღვინისთვის ძალიან მნიშვნელოვანია. როდესაც საუბარია აშშ-ის ბაზარზე, ეს ორმაგად მნიშვნელოვანია, რადგან ის მსოფლიოში ერთ-ერთი ყველაზე დიდი ბაზარია, სადაც აფასებენ ღვინოს, ეს ქვეყანა ღვინის ბაზარზე გარკვეულ წესებსაც ამკვიდრებს. აშშ-ში ექსპორტის შედეგების მიხედვით, წლიდან წლამდე მივიწევთ წინ, თუმცა ამ ქვეყანაში ჩვენი ღვინის პოტენციალი უფრო დიდია და ის ღონისძიებები, რომელიც ტარდება აშშ-ში, იქნება ეს გამოფენა, თუ სხვა სახის დეგუსტაციები, ძალიან მნიშვნელოვანია ქართული ღვინის ცნობადობის გაზრდისთვის ამერიკის ბაზარზე", - აღნიშნა იაგო ბიტარიშვილმა.

სამინისტროს ინფორმაციით, ტური ღვინის ეროვნული სააგენტოს მიერ იყო ორგანიზებული. სტუმრებს შესაძლებლობა ჰქონდათ დაეგემოვნებინათ შემდეგი ღვინის მწარმოებლების პროდუქცია: „ამირან ვეფხვაძის მარანი", „არჩილ გუნიავას მარანი", „რამაზ ნიკოლაძის ღვინოები", „პატარიძის საოჯახო მეღვინოება", „როიალ ხვანჭკარა", „უსახელაურის ვენახები", „ზურაბ თოფურიძის საოჯახო მეღვინოება", „მამუკა ჩხეიძის მარანი", „იაგოს ღვინოები", „საღვინარი", „ვიტა ვინია", „შალაურის ღვინის მარანი", „ჭოტიაშვილის ღვინის მარანი", ,,ფაფრის ველი", „მუკადო ვაინსი", „ლუკასი", „თამარ მილორავას ღვინოები", მეღვინეობა ,,ნიკა", „ოქრო ვაინსი", „ხოხბის ცრემლები" და „გიუაანი", ასევე ეწვიენ მექვევრე ზაზა კბილაშვილს.

როგორც სამინისტროში აცხადებენ, აშშ წარმოადგენს ქართული ღვინის ერთ-ერთ პოტენციურად მზარდ და მნიშვნელოვან საექსპორტო ბაზარს. აშშ-ში აქტიური მარკეტინგული ღონისძიებების განხორციელება ხელს შეუწყობს ქართული ღვინის ცნობადობისა და კონკურენტუნარიანობის ზრდას აშშ-ის ბაზარზე და ზოგადად ქართული ღვინის საექსპორტო არეალის გაფართოებას. მიმდინარე წლის 4 თვის მონაცემებით, საქართველოდან აშშ-ში 101 370 ბოთლი (0,75 ლ) ღვინოა ექსპორტირებული, რაც გასული წლის ანალოგიურ მაჩვენებელს 21%-ით აღემატება. 

 

ALLWINE.GE

 

 

ფილტრაცია

 

ხალხის აზრი