Background Image

ემუქრება თუ არა ქვევრის ღვინოს ფალსიფიკაცია, საერთაშორისო ბაზარზე?

11:50 11 ივნისი, 2018

საქართველოში ქვევრში ღვინის დაყენება 8 ათასი წლის წინ დაიწყო და ეს ტრაციდია დღემდე შენარჩუნებულია. ქვევრის ღვინის დაყენების ქართულ ტრადიციულ მეთოდს 2013 წელს, იუნესკოს (UNESCO) არამატერიალური კულტურული მემკვიდრეობის ძეგლის სტატუსი მიენიჭა, რაც ამ მეთოდის უნიკალურობაზე მიუთითებს და გზავნილია მთელი მსოფლიოსთვის, რომ ღვინო უძველესი ქართული კულტურის შემადგენელი ქვევრი ღვინის დასაყენებელი და შესანახი უნიკალური თიხის ჭურჭელია.

ქვევრის ღვინო ზოგადად გულისხმობს ყურძნის ტკბილის გარკვეული რაოდენობის ჭაჭასთან (თუ ჭაჭის გარეშე)  დადუღებას, დაღვინებასა და შემდგომ დავარგებას. ქვევრში ღვინის დაყენების პირველი და მნიშვნელოვანი წესი, არის ქვევრში ღვინის დაყოვნება  როგორც ალკოჰოლური დუღილის, ასევე მის შემდგომ პერიოდშიც. მასში ბუნებრივად და ქრონოლოგიურად მიმდინარეობს ის ქიმიური პროცესები, რომლებსაც ქარხნულ წარმოებაში სპეციალური დანადგარები და დანამატები სჭირდება.

საქართველოში ქვევრის ღვინოს, ბევრი ღვინის კომპანია აწარმოებს. ბოლო წლებში საქართველოში ქვევრის ღვინო კიდევ უფრო პოპულარული გახდა. ამის მთავარი მიზეზი ისაა, რომ ქართული ქვვერის ღვინით, უცხოელი ღვინის მოყვარულები და იმპორტიორები დაინტერესდნენ და თუკი აქამდე ქვევრის ღვინო მცირე რაოდენობით იწარმოებოდა, სამომავლოდ სხვადასხვა დიდი კომპანიების მიერ, მისი მასიური წარმოება იგეგმება .

სწორედ ამ ყველაფრის ფონზე არსებობს საშიშროება, თუ რამდენად სწორად მოხდება ქვევრის ღვინის წარმოება და ხომ არ დაიწყება მისი ფალსიფიცირება, ამ საკითხის შესახებ თელავის ღვინის მარნის დამფუძნებელი და ღვინის ექსპერტი, ზურაბ რამაზაშვილი გვესაუბრა.

„ნებისმიერი პროდუქტის ფალსიფიცირება შესაძლებელია, ამიტომ არც ღვინის სფეროშია გამორიცხული, თუმცა ვინაიდან ღვინის ეროვნული სააგენტოს მიერ, ღვინის დიდი კომპანიები ყოველთვის გადის კონტროლს, ძალიან მცირეა იმის შანსი, რომ ქვევრის ღვინის ნაცვლად ქარხნული წარმოების ღვინო გაიყიდოს. ხანდახან სრულიად შესაძლებელია ისიც, რომ გამოცდილმა დეგუსტატორმაც კი ვერ აღმოაჩინოს განსხვავება ქარხნულ და ქვევრის ღვინოს შორის, იმდენად იყოს გემო და სტრუქტურა მიმსგავსებული.

გარდა ამისა სხვადასხვა მწარმოებელს შეიძლება სრულიად განსხვავებული ტექნიკა ჰქონდეს და შესაბამისად განსხვავდებოდეს ქვევრის ღვინოების გემოც ერთმანეთისგან, ამიტომაც ძნელია ესე ერთმნიშვნელოვნად ვთქვათ ღვინო ნამდვილად ქვევრისაა თუ არა.  თუმცა მე მაინც მგონია, რომ ფალსიფიცირების შემთხვევები არ მოხდება. ერთადერთი რაც ეტაპზე შემიძლია ვთქვა ნდობის ფაქტორია, იმ დიდი ღვინის კომპანიების მიმართ, რომლებიც გადიან სრულ კონტროლს“.-აღნიშნა ზურაბ რამაზაშვილმა.

Myrest.ge- ამ თემასთან დაკავშირებით სადეგუსტაციო კომისიის თავმჯდომარეს, ანა გოდაბრელიძესაც ესაუბრა, რომელმაც ანალოგიური განცხადება გააკეთა.

„ჩემი აზრით, ქვევრის ღვინის მასიური წარმოება არანაირ საფრთხეებთან არაა დაკავშირებული, ვინაიდან ქართული ღვინო ჩვენთვის სიწმინდესთან ასოცირდება და კიდევ უფრო იმიტომ, რომ ქართული ღვინო შესაბამის კონტროლს ყოველთვის გადის. მიუხედავად იმისა, რომ ადვილი შესაძლებელია კარგმა მეღვინემ შეძლოს ქარხნული ღვინისა და ქვევრის ღვინის გემოების მიმსგავსება, ვთვლი რომ ეს არ მოხდება“.-აღნიშნა ანა გოდაბრელიძემ

,,შუხმან ვაი ჯორჯია”-ს წარმომადგენლის, ნუცა აბრამიშვილის განმარტებით, მათი ღვინის წარმოების 35%-ს ქვევრის ღვინო წარმოადგენს და ის ნამდვილი ტრადიციული მეთოდით მზადდება.

„100-ზე მეტი ქვევრი გაქვს ჩვენს საწარმოში და ქვევრის ღვინის ნამდვილი გემო, ყოველთვის ჩვენი მთავარი პრიორიტეტი იყო. ქვევრის ღვინის წარმოების ტექნიკა ხელშეუხებელია და ნამდვილად არ მგონია მისი ფალსიფიცირება მოხდეს. ქვევრის ღვინოს აქვს სპეციფიური გემო, ფერი, სუნი და მეტად ალკოჰოლურია, შესაბამისად ადვილი გასარჩევია ამ მახასიათებლებით.

ვფიქრობ რომ არ კუთხით ქვეყანა დამატებით რეგულაციებს არ საჭიროებს, რადგან ამ ეტაპზე ყველა საექსპორტო ღვინო და დიდი კომპანია გადის მკაცრ კონტროლს“.-ნუცა აბრამიშვილი.

ღვინის ეროვნულ სააგენტოსთან დაკავშირების შემდეგ კი ჩვენთვის ცნობილი გახდა, რომ, ამ ეტაპზე დეგუსტაციას გადის და მკაცრად კონტროლდება მხოლოდ საექსპორტო ღვინოები და დიდი კომპანიები, შიდა ბაზარზე კი მნიშვნელოვანი რეგულაციები არ ტარდება, თუმცა სამომავლოდ შიდა ბაზარიც ანალოგიურად გაკონტროლდება და როგორც ქვეყნის გარეთ.

 

 

ავტორი: ანი გიგაური

 

 

 

კომენტარები

X