Background Image

თუ ღვინის მოყვარული ხარ, მაშინ ეს დღე შენთვისაა

14:26 12 მაისი, 2018

ერთ-ერთი მნიშვნელოვანი დღე მეღვინეებისთის, ახალი ღვინის ფესტივალია და წელს მისი რიგით მეცხრე ცერემონია გაიმართება.

როგორც myrest.ge-ს ფესტივალის საზოგადოებასთან ურთიერთობის მენეჯერმა, ნათია გაჩეჩილაძემ განუმარტა, 12 მაისს, მთაზმინდაზე 11:00 საათიდან 18:00 საათამდე გელოდებიან.
„ახალი ღვინის ფესტივალი წლების მანძილზე უკვე ნამდვილ სახალხო დღესასწაულად ჩამოყალიბდა, რომლის მთავარი მიზანიც ქართული ღვინის პოპულარიზაცია, საქართველოში ღვინის განათლების დონის ამაღლება და სამომხმარებლო კულტურის გაზრდაა.

2010 წლიდან დაწყებული, ყოველ წელს ფესტივალის მასშტაბი იზრდება, ახალ-ახალი საოჯახო მარნები და ღვინის კომპანიები გამოდიან ასპარეზზე და გვაცნობენ თავიანთ მოსავალს. 2017 წელს ფესტივალზე შეკრებილი იყო დიდი, საშუალო და მცირე მეღვინეობები, ასოციაციები და სახელმწიფო ორგანიზაციები – სულ 200-ზე მეტი სუბიექტი. ახალი ღვინის ფესტივალს ღვინის მწარმოებლების გარდა მოუთმენლად ელიან ქართველი და უცხოელი ღვინის პროფესიონალები, ღვინის მწერლები, ღვინის ბარ-რესტორნები და მოყვარულები. რამდენიმე წელია, ტრადიციულად, მსოფლიოს სახელოვან ღვინის მაგისტრებს, სომელიეებს, იმპორტიორებსა და ღვინის მწერლებს ჩანიშნული აქვთ ახალი ღვინის ფესტივალის თარიღი (მაისის მეორე შაბათი) და ემზადებიან ქართულ ღვინოებთან შესახვედრად.

ქართული ღვინის ყველა ქომაგს წლევანდელი ახალი ღვინის ფესტივალი კვლავ მთაწმინდის პარკში ელის, სადაც საქართველოს სხვადასხვა კუთხის ღვინის დიდი კომპანიები, საშუალო და მცირე მეღვინეობები, ოჯახური მარნები, ფესტივალის სტუმრებს დაახვედრებენ ბოლო მოსავლის (2017 წლის) საუკეთესო ღვინოებს. ახალი ღვინის ფესტივალის ხიბლი სწორედ მრავალფეროვნება და ახალი გემოების აღმოჩენაა, თან უშუალოდ ღვინის მწარმოებლებთან შეხვედრისას უფრო მეტის გაგება შეგვიძლია იმ ღვინის შესახებ, რომელსაც დავაგემოვნებთ და მოგვეწონება.

ახალი ღვინის ფესტივალი 2018 დაიწყება ქვევრის გახსნის ტრადიციული ცერემონიით, მრავალჟამიერის თანხლებით. ამ ქვევრში, როგორც წესი, ღვინის კლუბის მიერ შერჩეული საოჯახო მარანში დაწურული საუკეთესო ღვინო დაგხვდებათ. ახალი ღვინის ფესტივალი 2018-ის მხარდამჭერები არიან ღვინის ეროვნული სააგენტო და ქ. თბილისის მერია.

ფესტივალს მუსიკალურად გააფორმებენ: რეზო კიკნაძის ჯაზბენდი, „ბენდი ნალი“, ფოლკლორული ანსამბლი “დიდგორი” და ხონის სახალხო სასულე ორკესტრი. ჩატარდება გათამაშდებაც, ფესტივალზე სადეგუსტაციო ჭიქის შეძენისას, მიიღებთ გათამაშების ბილეთს, რომელიც უნდა ჩააგდოთ ქვევრში. 13:10, 14:10, 15:10, 16:10 საათზე გამოვლინდებიან გამარჯვებულებ, ქვევრიდან შემთხვევითობის პრინციპით ამოღებული ბილეთით. გამარჯვებლებს საჩუქრად 10 ლიტრიანი საუკეთესო საფერავით სავსე სასაჩუქრე კასრი გადაეცემათ.

ფესტივალზე, ასევე გაიმართება ტრადიციული და თანამედროვე ხელნაკეთი ნივთების გამოფენაც, სტუმრებს საშუალება ექნებათ საკუთარი ხელით შექმნან თიხის ნაკეთობები. ფესტივალის კარი ყველა სტუმრისთვის ღიაა“.

 

ავტორი: ანი გიგაური

 

კომენტარები